«Парасат майданы» спектаклі Мәскеуде көрсетіледі

Қазақстанның Ресейдегі Мәдениет күндері аясында Қалибек Қуанышбаев атындағы Қазақ ұлттық музыкалық драма  театрының «Парасат майданы» спектаклі Мәскеу көрерменінің назарына ұсынылады. Арнайы көрсетілім 13 қазан күні сағат 19.00-де Кіші театр сахнасында өтеді.

«Парасат майданы» — адамның ішкі әлемі мен рухани құндылықтары туралы сыр шертетін психологиялық драма.

Қойылым қазақ әдебиетінің классигі Төлен Әбдік шығармаларының негізінде («Оң қол» және «Парасат майданы») сахналанған. Қоюшы режиссері – Қазақстанның еңбек сіңірген қайраткері Гүлсина Миргалиева. Қоюшы және киім суретшісі – Шынар Елембаева. Хореограф – Карина Джиренбаева.

Спектакльдің негізгі өзегі — адамның өз-өзімен күресі, қоғамдағы моральдық құндылықтардың жоғалуы және ақиқаттың тереңіне үңілу. Басты кейіпкер — жалғыздық пен ішкі қайшылықтың құрбанына айналған жан. Ол адамдар арасындағы әділетсіздікке қарсы үн қатып, қоғамның қатал жүйесіне қарсы тұруға тырысады.

Қойылым барысында көрермендер рухани құндылықтар мен материалдық әлемнің қайшылықтарын, адам болмысының күрделілігін, жақсылық пен жамандықтың ара жігін ажырату мәселелерін терең сезінеді.

«Парасат майданы» — адамның рухани биігіне жету жолындағы күресін бейнелейтін, көрерменді ойландыратын, өмірдің шынайы мәнін іздеуге жетелейтін туынды.

Спектакльде басты рөлді Қазақстанның еңбек сіңірген қайраткері Нұркен Өтеуіл сомдайды.